नेपालमा हवाई मार्गबाट आउने पर्यटकको सङ्ख्यामा यस वर्ष सन् २०१० को जनवरीमा गतवर्षको जनवरीको तुलनामा १ दशमलव ८ प्रतिशतले वृद्धि भएको छ।
यस वर्षको जनवरीमा २६ हजार ७१ जना पर्यटक नेपाल भित्रीसकेको त्रिभुवन अन्तरराष्ट्रिय विमानस्थल, अध्यागमन विभागले जनाएको छ।
सन् २००९ को जनवरीमा २१ हजार ९४४ पर्यटक नेपाल आएका थिए। यसैगरी दक्षिण एसियाली मुलुकहरु भारत, बङ्गलादेश, पाकिस्तान, श्रीलङ्काबाट पनि यस अवधिमा क्रमशः ९.९ प्रतिशत, ४३ प्रतिशत, ३६ प्रतिशत र ९.९ प्रतिशतले पर्यटक आगमनमा वृद्धि भएको तथ्याङ्क रहेको छ।
मलेशियाबाट ५६ प्रतिशत, ताइवानबाट साढे ५ प्रतिशत पर्यटक बढे पनि मित्रराष्ट्र चीनबाट १८ प्रतिशत, सिङ्गापुरबाट ३ प्रतिशत र थाइल्याण्डबाट २५ प्रतिशतले पर्यटक आगमन घटेको छ। युरोपेली मुलुकहरुबाट भने समग्रमा ३४ दशमलव ९ प्रतिशतले पर्यटक आगमनमा वृद्धि भएको उल्लेख गरिएको छ।
नेपाल पर्यटन वर्ष २०११ मनाउन नेपाल सरकार र पर्यटन व्यवसायीले सहकार्यका साथ अघिबढी रहेको अवस्थामा सन् २०१० कै पहिलो महिनामा पर्यटक आगमनमा आशातित् वृद्धिले सरोकारवाला पक्षहरु उत्साहित देखिएका छन्।
नेपालमा शान्ति प्रक्रियाको सुरुवात भएको सन्देश विश्व पर्यटन बजारमा प्रचारप्रसार भइरहेको अवस्थामा बन्द, हडताल र चक्काजाम जस्ता कार्यक्रमहरु पूर्णरुपमा बन्द भएमा देशभित्र दस लाख पर्यटक भित्र्याउने नेपाल पर्यटन वर्ष २०११ को मुख्य उद्देश्य पूरा हुने पर्यटन व्यवसायीहरुको अपेक्षा रहेको छ।